Divan Edebiyatı 18.yy

[Hacker]

Şair: Şeyh Galib
Türü: Gazel
Başlık: Gül âteş gül-bün âteş gül-şen âteş cûy-bâr âteş
Şiir:
Gül âteş gül-bün âteş gül-şen âteş cûy-bâr âteş
Semender-tıynetân-ı aşka beştir lâle-zâr âteş

Hemân ey saki bir sâgar tutuşdur dest-i dil-dâra
Gazabla bezme geldi şem'-i meclis-veş yanar âteş

Nesîm âteş çıkardı gonce-i çeşm-i ümidimden
Bırakdı gül-şen-i amalime berk-ı bahar âteş

Hayâl-i hasreti hâlinle âh etdikçe uşşâkın
Şeb-i firkatde her dem ahterân eyler nisâr âteş

Bana dûzahtan ey meh dem urur gül-zârlar sensiz
Diraht âteş nihâl âteş gül âteş berg ü bâr âteş

Mürekkebdir vücûdu tâ ezel yek-pâre sûzişten
Anâsırdan meğer uşşâka olmuşdur du-çâr âteş

Çerâğ-ı bezm-i hecri olduğum yapmış yakışdırmış
Gönül pervanesine vuslat âteş intizâr âteş

Meğer kilk-i sebük-cevlânın olmuş germ-rev Gaalib
Zemin âteş zaman âteş bütün nakş ü nigâr âteş



Açıklama: Mefâîlün mefâîlün mefâîlün mefâîlün

[Hacker]

Şair: Şeyh Galib
Türü: Gazel
Başlık: Yine zevrak-ı derûnum kırılıp kenâre düşdü
Şiir:
Yine zevrak-ı derûnum kırılıp kenâre düşdü
Dayanır mı şîşedir bu reh-i seng-sâre düşdü

O zaman ki bezm-i canda bölüşüldü kâle-i kâm
Bize hisse-i mahabbet dil-i pare pâre düşdü

Gehi zir-i serde desti geh ayağı koltuğunda
Düşe kalka hasta-i gam der-i lûtf-i yâre düşdü

Erişip bahara bülbül yenilendi sohbet-i gül
Yine nevbet-i tahammül dili bî-karâre düşdü

Meh-i bürc-i ârızında gönül oldu hâle mail
Bana kendi tâliimden bu siyeh sitâre düşdü

Süzülüp o çeşm-i âhû dedi zevk-ı vasla Yâ Hû
Bu değildi n'eyleyim bu yolum intizâre düşdü

Reh-i Mevlevi'de Gaalib bu sıfatla kaldı hayran
Kimi terk-i nâm ü şâne kimi i'tibâre düşdü



Açıklama: Mütefâilün faulün mütefâilün faulün

[Hacker]

Şair: Şeyh Galib
Türü: Gazel
Başlık: Gencînen olsam vîrân edersin
Şiir:
Gencînen olsam vîrân edersin
Âyînen olsam hayran edersin

Tîr-i nigehden dâğ-ı derûna
Baksan ne işler seyrân edersin

Saki keramet sende ya bende
Bahri habâba mihmân edersin

Nezzâre-i germ etdikçe ey çeşni
Âteşle âbı yek-sân edersin

Ey huşk zâhid dem urma meyden
Dest-i duayı mercan edersin

Zâhid o meh-veş bir nurdur kim
Büttür demezsin îmân edersin

Mâdâm uçarsın gözlerde amma
Rûyun perî-veş pinhân edersin

Tabl-ı tehîden gümdür suhanler
Bî-hûde Gaalib ef gaan edersin

Etvâr-ı cerhe uy mevlevî ol
Seyrân edersin devrân edersin



Açıklama: Müstef'ilâtün müstef'ilâtün

[Hacker]

Şair: Şeyh Galib
Türü: gazel
Başlık: Billâh yuf bu şu'bede-i hîçkâre yûf
Şiir:
Billâh yuf bu şu'bede-i hîçkâre yûf
Yuf kadr ü câh ü tantana-i hîçkâre yûf
Paşa ki bulmaya ser-i maktûuna kefen
Ol tûğ u tumturak u ilm ü i’tibâra yûf
Bâd-ı ecel ki söndüre kandil-i cânını
Başı ucunda bîhude şem’i mezâra yûf
Kerrat ile bu safha-i âlemde çekmişim
Bu sûret-î mükerrer-i leyl ü nehâra yûf
Bir hâne kiö binâsı ola âh u eşkden
Yazık o âb ü renge o nakş-ı nigâra yûf
Gâlib penâh-ı fakra gir abdal meşreb ol
Al kürrenâ-yı destine çal rûzgâra yûf
Oldukça söylerim der-i Molla’da kâmyâb
Dünyâ gamında çektiğim ol âh u zâra yuf



Açıklama: Vezni: Mef’ûlü fâ’ilâtü mefâ’îlü fâ’ilün